Blinde Sambok

Niemand het gedink ek sal hoor nie, maar ek hét.
Moenie dink omdat jy maar net tien minute gelede gebore is, omdat jy rooi en opgeskroef en lelik is, dat jy ook dom is, of nie kan hoor wat gepraat word nie. Jy kán.
"Hierdie hopie sprinkaanbene... Is dit 'n kind? Is dit mýne?"
Ek het my pa gehoor, en dit het die kwaad in my losgemaak, tóé al. En toe hoor ek ook die ander ding, die wat suster Van Schalkwyk vir my gesê het. Dit wat sy wat gesê het, het ek ook met my saamgevat. En dit het die wen in my losgemaak, tóé al. Want ek, die meisiekind wat my pa nie wou hê nie, moes baklei teen die vloek van die Gideon de la Reys...

Riana Scheepers, bekroonde skrywer van onder meer "Dulle Griet", "Die heidendogters jubel" en die gewilde "Katriena"-boeke, neem die leser na 'n jeugwêreld op 'n plaas waar saans na oustories om 'n misvuur geluister word. Maar altyd is daar in die jong Gideonette de la Rey se lewe die bedreiging van die blinde sambok, die bliksemstraal wat in 'n oomblik alles kan verander.