Christian Books

Hi ouens! Vat 'n paar minute per dag en dink na oor die wonderlike dinge wat God deur die lewens van groot Christene gedoen het. Selfs al het jy net vyf minute is dit genoeg tyd om met jou hemelse Vader te gesels, die Bybel te lees, te bid en 'n paar wonderlike ware verhale te lees.

• Leer meer oor iets wat regtig gebeur het
• Lees God se Woord
• Gesels met God

Dis drie maklike stappe om jou te help om jou eie stiltetyd te hou.

"Ek hoop dat hierdie lekkergoed-dagstukkieboek 'n sagte malvalekkerhart by jou sal kweek en dat jy jou lewe, ten spyte van al die suurwurms op jou lewenspad, baie sal geniet."

Hoe kan ek in 'n nuwe kragtige geloofsrat inbeweeg? Deur 'n ware konneksie met die Here te maak en die werking van sy Heilige Gees eerstehands te begin ervaar. In hierdie onopgesmukte dagstukkies deel Susan Coetzer stories uit haar lewe wat jou sal help om die Here se nabyheid oral tasbaar te ervaar: van die trapmeul by die werk en huis tot die glasskerwe op jou lewenspad. Die 250 dagstukkies is daarop gemik om geestelike groei aan te moedig deur nuwe maniere van dink en doen te kweek en in te oefen. Dit sal jou bemoedig om geestelik sterker te word sodat jy as gelowige staande kan bly in die moeilike tye waarin ons leef.

Vriendelikheid is om jou krag te gebruik om saggies heel te maak, sonder om iets terug te verwag.

Die bekende skrywer en Andrew Murray-pryswenner Andries Cilliers begelei lesers op 'n kragtige, maar deernisvolle 100-dae reis. Hy inspireer ons om vriendeliker te leef en te wees: met die mense rondom ons, en met onsself. Só leer ken ons ook ons Vriend.

"Hierdie twee oortuigings - dat Jesus die Here is en dat die Bybel die Woord van God is - is die hoekstene van my geloof."

Neels Jackson, gerespekteerde kerkjoernalis vir byna 30 jaar, bespreek in dié boek wie Jesus is, en wat die implikasies van Jesus se liefde vir die gay-gesprek in die kerk is. Jackson ondersoek omstrede tekste in die Bybel en kyk na die konteks waarin hulle geskryf is, en na misverstande oor gay mense wat wyd in die kerk bestaan. Hy skryf ook weerloos en eerlik oor sy eie geloofstryd en die gevolgtrekking waartoe hy gekom het.

Laat "Die sakpas-Bybel met oordenkings vir vroue" jou hart instem op dit wat God vir jou beplan het.

Elkeen van die 366 oordenkings bied:
• 'n Versameling sleutelvrae oor relevante onderwerpe soos aanbidding, ewige lewe, genade, kinders en oorwinning in Christus.
• 'n Kragtige oordenking deur Norma Rossouw oor die onderwerp wat geestelike groei aanmoedig.

Die tematiese indeks maak die opspoor van enige onderwerp maklik en eenvoudig.
"Die sakpas-Bybel met oordenkings vir vroue" sal jou elke dag inspireer op jou geloofsreis!

"Die sakpas-Bybel met oordenkings vir jong mans" is die ideale reisgenoot op jou lewensreis.

Elkeen van die 366 oordenkings bied:
• 'n Versameling sleutelverse oor relevante onderwerpe soos aanbidding, ewige lewe, identiteit, verhoudings en waardes.
• 'n Kort oordenking deur Johan Smith oor die onderwerp wat geestelike groei aanmoedig.

Die tematiese indeks maak die opspoor van enige onderwerp maklik en eenvoudig.
Laat "Die sakpas-Bybel met oordenkings vir jong mans" jou hart instem op dit wat God vir jou beplan het.

Ontdek die wonders van die heelal saam met die Skepper

Dit is onmoontlik om te verstaan hoe groot God regtig is. Hy beheer tyd, skep lig en laat dinge onstaan deur net 'n woord te spreek - van die grootste sterre tot die kleinste seester. God is 'n kragtige, doelgerigte, persoonlike en fantastiese Skepper.

Psalm 19:2 sê: "Die hemele verkondig die heerlikheid van God. Die uitspansel getuig van die werk van sy hande."

"Onbeskryflik" vertel van die wonderlike skepping met wetenskapike feite, foto's en oorspronklike illustrasies. Hierdie 100 dagstukkies sal jou oopmond laat staan in verbasing oor God se kreatiwiteit deur te kyk na:
• Die ruimte, sterrestels. planete en sterre
• Die Aarde, oseane en die weer
• Diere - van duiwe tot dinosourusse
• Ons verstand, liggaam en verbeelding

Elke dagstukkie bevat 'n "VERWONDER JOU" gedeelte, praktiese aktiwiteite, en 'n gebed. "Onbeskryflik" sal kinders help om die ongelooflike skepping van ons onbeskryflik wonderlike God te ontdek.

'n Lewe van oorvloed is vir ons elkeen beskore.

Maar wanneer dit sleg gaan, is dit soms moeilik om dit te glo.
Wat as jy kan verander wat jy glo? Sodat die bewyse meer sigbaar in jou lewe raak?
Dis wat dankbaarheid doen. Dit laat ons soek vir die dinge wat ons weet maar nie glo nie, want ons harte is met te veel vrees en angs gevul.
Dankbaarheid verander ons perspektief op die lewe sodat ons vanuit Liefde na alles kyk.
Neem 'n 100-dae reis van dankbaarheid saam met Francine Prins - en sien dat dit heel eenvoudig is om in dankbaarheid te leef en dat die beloning groot is.

God weet wat ons wil hê nog voordat ons daarvoor vra.

Hy weet hoe elkeen van ons se lewenspad lyk nog voordat ons die pad gestap het. "Rigtingwysers vir jou lewenspad" is 'n padkaart met wyshede vir wanneer jy rigting verloor of wanneer die uitdagings sonder waarskuwing opduik. Dis dagstukke bring moed in swaarkry-tye spdat jy sonder sukkel die struikelblokke kan oorkom. Piet Smit het 150 oordenkings geskryf om jou te help koershou deur die lewe se storm- en sonskyndae. "Rigtingwysers vir jou lewenspad" is 'n kompas vir daardie oomblikke wanneer die wind jou skip in die verkeerde rigting wil stuur.

"Gebed vir elke geleentheid" bevat meer as 100 gebede vir elke geleentheid om gelowiges se gebedslewe te versterk en aan te vul.

Gebed maak dit moontlik om vrymoedig tot God te nader. Daar is tye wanneer ons graag ons harte na God wil wend, maar ons kan nie die regte woorde vind om ons gedagtes en gevoelens aan die Here oor te dra nie.
In hierdie praktiese boek het Hennie Maartens meer as 100 hartsgebede saamgevoeg in 'n unieke bundel. Die leser kan riglyne vind vir gebed om na die hemelse Vader uit te reik te midde van elke seisoen, situasie, lewensgebeurtenis of beproewing.
"Gebed vir elke geleentheid" is nie net die perfekte boek om 'n persoonlike gebedslewe te verryk nie, maar ook die ideale boek vir mense wat vir groepe moet bid, soos mense in die onderwys, skoolhoofde, predikers, ouderlinge, selgroepleiers en jeugleiers.

Agab staan verskeurd. Moet hy getrou bly aan die ou Israelitiese waardes, of kan hy sy heidense vrou, die skone en geslepe prinses Isebel, volg die afvallige tydgees in? Teenoor die lis van Isebel staan die skraal, profetiese figuur van Elia. Elia wat die droogte oor Israel voorspel het, die profete van Baäl in 'n tweestryd op Karmelberg verneder, en uiteindelik die finale doemwoord oor Agab en sy huis uitspreek.

"Die koning se wingerd" vertel ook die verhaal van Nabot, godvresend, maar nie bereid om te erken dat God die God van alle mense is nie. En van die liefde van Nabot se seun Johanan vir Ada, die dogter van hul dienskneg. Dan is daar Johanan en God se plan om Israel te verlos van Agab se slegte regering.


Die geliefde skrywer F.A. Venter herskep die wêreld van Agab, Nabot en Johanan, die vroue in hul lewens, en die politieke strome wat hul omring het, met die gesag van iemand wat diep nagevors en nagedink het. Hy laat dié aangrypende stuk Bybelse geskiedenis opnuut leef in fyn besonderhede, en die Bybelse waarhede wat só deurskemer is verstommend relevant vir vandag.

Waar hoort vroue in die samelewing? Hul rol as versorgers word geredelik erken, maar wat van die openbare sfeer - waar hoort vroue in die kerk, die politiek, die sakewêreld, sport en wetenskap? Was dit altyd so, of het dié rol oor die jare verander?
Bettina Wyngaard, Pverbergse skrywer, dromer, aktivis en reggeleerde, ontleed dié kwessie in 'n gesprek tussen die Bybel en Suid-Afrika se grondwet.
Sy kyk spesifiek na die sogenaamde tekste van verskrikking ("texts of terrors") in die Bybel. Hoe moet ons dit verstaan? Het vroue in die Bybelse tye dinge anders beleef as ons vandag? En hoe staan dit vandag met vroue - as versorgers in die Covid-19-pandemie, as leiers in die kerk, as huiswerkers? En wat van seksuele teistering by die werk, transgenderregte en hutsmerk-aktivisme?
"Onverskrokke vroue" bied 'n omvattende, deeglik nagevorste en indringende blik op aktuele vrae waarmee ons daagliks worstel. Terselfdertyd vier dit vroue se moed en sal jou nie net diep laat dink nie, maar ook opnuut inspireer.

"Al sou die vyeboom nie bot nie en daar geen druiwe aan die wingerde wees nie, al sou die olyfoes misluk en die lande geen oes lewer nie, al sou daar geen kleinvee in die kampe meer wees nie en die beeskrale sonder beeste wees, nogtans sal ek in die Here jubel, sal ek juig in God, my Redder."
- Habakuk 3:17

Hoe hou ek vas aan God as my en ander se ervaringe nie hoop weerspieël nie?
Ivor Swartz, die bekende jeugpredikant van Pretoria, lei ons om aan die hand van Habakuk 3:56 te vra hoe 'n nogtans-geloof lyk. Hoe praat, bid en leef ek voor ander as dit sleg gaan met my? Hoe bly ek geanker in God, eerder as om op die uitkoms te fokus?
Ivor leer ons om 'n nogtans-geloofuitkyk toe te pas deur te kies: Kies om te lewe vir dit wat ewigheidswaarde dra. Verander jou perspektief in tye van krisis en swaarkry, en reageer op 'n nogtans-manier.

'n Inspirerende boek wat hoop gee.

God se vroue van gister praat reguit met God se vroue van vandag.

Die vroue van die Bybel speel 'n integrale, wesenlike en beslissende rol in God se ewigheidsplan. Uit 'n hemelse oogpunt is vroue altyd uniek, weergaloos en onvervangbaar - hulle speel nooit 'n ondergeskikte rol in God se koninkryk nie. Soos hierdie Bybelstudie wys, demonstreer hierdie vroue van die Bybel vir ons die verhewe ideale van geloof en getrouheid, deugde en waardes, verstand en skoonheid, bevryding en vindingrykheid, diensbaarheid en opofferings.

Deur 'n indiepte-studie van elk van hierdie merkwaardige vroue van die Bybel sal jy ontdek dat God die hedendaagse vrou oproep om 'n betekenisvolle rol te speel in die gemeenskap, in die huis en in die kerk. Jy sal uit hulle foute leer en ontdek dat God se seëninge orovloedig is vir die vrou wat in alle omstandighede getrou op die Here vertrou.

In "Vroue van die Bybel" sal jy te staan kom voor vrae soos:
• Wanneer jy met kommer of probleme gekonfronteer word, kies jy die pad van bitterheid of die pad van gebrokenheid?
• Het jy geleer dat jy nie die verlede kan verander nie, maar die verlede well op die altaar kan plaas?
• Hou jy jou besig met dinge wat ewigheidswaarde het?
• Het jy al geleer dat ongeag die situasie waarin jy jou bevind, God groter is as die situasie?
• Behoort jou hart volkome aan die Here?
• Het God al die smeltkroes van teëspoed gebruik om jou karakter te vorm sodat dit soos suiwer goud blink?

In "Vroue van die Bybel" ontdek jy:
• Eva
Om God te volg nadat ons misluk het
• Sara
'n Gelowige vrou
• Mirjam
Vertrou op God met jou plek in die lewe
• Ragab
'n Nuwe begin met geloof
• Debora
Dis nie jou stryd nie, maar God s'n
• Rut
Om ons Verlosser te volg
• Hanna
Bring jou onvrugbaarheid na die Here
• Ester
Bruikbaar vir God waar Hy ons ook al plaas
• Die deugsame vrou
Lewenslesse uit Spreuke 31
• Maria en Marta
Sien wat ewig is
• Maria, die ma van Jesus
Die reis van 'n diensmaagd
• Die bruid van Christus
Lewe in die skoonheid van heiligheid